بلوچستان ءِ راجی جنزءِ دیمپان چے اَنت؟

 

دومی بهر

ایران ءُ پاکستان ءِ همکاری

بلوچ راج ءِ دژمنانی همکاری یکے چه مئی راجی جنزءِ مزنین دیمپانان اِنت۰ اے شومیں همکاری چه جنرال ایوب خان ءِ دورءَ بگر  تان هنوگیں وهد جاری انت۰ رند چه شهید دادشاه ءِ سرمچاریں برات احمدشاهءِ دسگر کنگ ءُ ایرانی واکدارانی دستا دیگءَ ( ۱۹۵۷ ) پاکستانی پئوج ءُ اسلام آباد ءِ واکدارانی همشوری ءُ همکاری گوں تهران ءِ لدیگی واکدار گیشتر ءُ  نزیکتر بوت۰

گوشت کنیں که  چه سال ۱۹۷۰ عیسایی ءَ  اشانی  سیستماتیکیں همکاری بلوچ راج ءِ هلاپ ءَ تیز تر بوت۰ ذوالفقـارعلی بهٹـو ومحمـد رضـا شاه گوں بلوچستان ءِ بمباری  ءُ بلوچستان ءِ  هکومت بزان واجه عطـاءِالله مينـــگل ءِ واکداری دورءِ هلاس کنگ ءَ مان رودراتکی بلوچستــان ءَ وتی شومپالیں همکاری ءَ بلوچ راج ءِ هلاپ ءَ  سیستماتیک کت۰

رند چه شاه ءِ تچگ ءَ همینی ءِ ٹولی ماں ایران باج برت ءُ  تهران ءُ  اسلام آباد ءِ همکاری ءِ نوکیں دورے بنگیج بوت.    گوستگیں سی ءُ نه سالاں ایرانی سپاه ءُ پاکستانی پئوج ءِ هوری ءُ سیستماتیکیں برنا مه ءُ همکاری بلوچستان ءِ راجی جنز ءَ باز تاوان داتگ۰ 

ماں بلوچستان ءِ راجدپترءَ  اولی رندانت که نوک مسلمانیں هندوستانی مهاجر،  پنجاپی ءُ پارس رستراں په بلوچستان ءِ مدامی زوربرد کنگ ءَ هنچو نزّیک ءُ هم کوپگ بوتنت که بلوچانی هلاپ ءَ مشترکیں جاسوسی، اقتصادی، تجارتی، امنیتی ءُ چاروگی  کمیته ءُ هوریں اداره اِش جوڑ کت۰ اے همکاری نالائکین احمدی نژاد ءُ جنرل پرویز مشرف ءِ دور ءُ رندترا رحمان ملک ءِ سروزیری وهدا هنچو باز اَت که گیش چه بیست ءُ پنچ بے میاریں بلوچ ورنا ماں پاکستان ءَ دسگر ءُ سپاه قدس ءِ دستا دیگ بوتنت۰ آ ماں ایرانی کورچاتاں شزا دیگ ءُ کشگ بوتنت۰  

هما درگت ءَ ایرانی سپاه هم رودراتکی بلوچستان ءِ چنت ورناے ءَ ماں ایران گپت ءُ پاکستانی واکدارانی دستا داتنت، شهید محمد یونس بلوچ ( واجہ مُراد ) بی۰ال۰اف - پنجگورءِ اولی کمانڈر یکے چه هما ورنایان اَت که ماں مگربی بلوچستان ءَ ایرانی سپاه  دسگر کت ءُ پاکستانی پئوج ءَ دستا دات۰

 آیی ءِ شزادیستگیں لاش هورگوں شهید جلیل ریکی ءَ۲۲ نوامبر ۲۰۱۱ ءَ ماں  مند ءِ کوهِ شیرازءَ  درگیجگ بوتنت۰

گوں پاکستان ء ایران ءِ جاسوسی ءُ چاروگی همکاری  گڈسرا شهید عبدالمالک ریکی سپاه قدس ءِ دستا کپت ءُ حمید ریکیءُ  سردار تاج محمد گمشادزی، کمانڈر عابد زامرانی، مولوی عبدالرئوف ریگی ، ابابگر ریکیءُ باز دگه  بلوچ ورنا شهید کنگ بوتگنت۰

دژمنانی وڑوڑیں همکاری بلوچانی زند جاوراں چه تپتان ءَ بگر تاں گواتر باز هراب کتگ انت.  مئی راجی جنزءِ مزنیں دیمپانے بلوچ دژمنیں پارس  ءُ پنجاپ ءِ شست سال ءِ همکاری اِنت۰

  اے دیمپان پروشگ لوٹیت۰

آزات ءُ آبــاد بات گنجيـــں بلـوچستـــــــــان

پروشـت ءُ پروش باتنــت ايران ءُ پاکستــان 

محمــد کريــم بلــوچ

سپتامبر ۲۰۱۷