بلوچستان ءِ راجی جنزءِ دیمپان چے اَنت؟

چارمی بهر

ناشریں پگری گلامانی وجود ءُ آهانی بلوچ دژمنیں کارکرد هم بلوچستان ءِ راجی جنزءِ دیمپان اَنت۰ اے وت زاهرءَ بلوچ انت ءُ پت ءُ پیرکان اش هم بلوج اَنت بلئے اے ناشراں راجی مارشت په بیه نیست۰ اے  گوں وتی چکاں پارسی گپ کننت۰ اشاں بلوچستان ءِ راجدپتر ءُ راجدپتری سیمسراں په درآمدانی هاترا ٹگلینک لوٹنت۰  په درور چنت نپر چریشاں که په وتی منّ ءَ ندکار انت میر همل کلمتی ءُ زهم جنیں میرکمبر ا ایرانی زاننت۰

هست انت هنچیں پگری گلام که میر جیند ءُ میر جما هان ءِ راجی پجّارءَ گار کنگ لوٹنت ءُ گوشنت که آ ایرانی اتنت ءُ په ایران هاترا گوں انگریز ءُ پرنگی یاں جنگ اِش دات۰ 

همے چم جهلیں  پگری گلاماں گوں دژمناں  همشور اَنتءُ په رونشتی بلوچستان ءِ ٹکّر ٹکّر کنگ ءَ په  زوالکاریں زابلی ٹولیان ءُ هامنه ای ءِ سپاه ءَ گلامی کنگاینت۰ 
هست انت هنچیں پگری گلام که بلوچان اِش بازشزاوار کتگ۰ اے دژمن پسند بلوچاں باز تاواں داته ءُ  اشانی لگام درآمدانی دست اِنت۰ بلوچستان ءِ بیدارین ءُ اگده داریں جهدکار پگری گلامانی  دیما هر وڑ ءَ که بوت کنت بدارنت۰ 
اداں دو درور چه  رونشتی بلوچستان ءِ پگری گلاماں نام گر کنگی انت۰ 
هدایت میرمرادزی درآمدانی هما پگری گلام انت که بید چه هونواریں هامنه ای ءِ مریدی ءَ په بلوچ راج ءِ تباهی ءُ بلوچستان ءِ ویرانی ءَ گوں دژمناں هم کوپگ ءُ همشور انت۰ اے ناشریں شومپال گوں درآمدانی "طرح تقسیم بلوچستان" ءُ هم گوں دژمن ءِ بلوچ دژمنیں " طرح توسعه سواحل مکران"  هورانت۰ هدایت میرمرادزی هامنه ای ءِ "ولایت" ٹولی ءِ هاسیں پگری  گلام انت ءُ په  بلوچ ءُ بلوچستان ءَ تاوانے انت۰ 
دگه پگری گلامے نعیم ڈمنی امینی فرد انت که ماں ملایانی مجلس ءَ  گوں لدیگی شهریاری ءَ هم زان ءُ هم شور انت۰ اے دژمن پسندیں ناشر هورگوں شهریاری تهران ءِ واکدارانی جارچین اَنت تنکه " طرح تقسیم بلوچستان" ءَ دیما به برانت۰
امینی فرد درآمدانی پگری گلام ءِ اولی انٹرویو گوں پارسیانی رسانکاں مان مجلس ءَ بلوچستان ءِ ٹُکّرٹُکّر کنگ ءِ باروا اَت۰ آیی اِش پرمائینتگ اَت تاں جار بجنت که " طرح تقسیم بلوچستان" په بلوچانی نپ ءُ سیت اِنت! 

ناشریں امینی فرد وتی چم بستگ انت ءُ کرمان ءُ هرمزگان ءِ بلوچانی بزگی ءُ بے وسی ءَ نگندیت۰ رند چه بلوچستان ءِ آوارجنگ ءَ  سئے مزنیں بهر چه ملک ءَ په زور سندگ بوتنت۰ بلوچانی ڈیه ءِ بهرے گوں هراسان، دگه بهرے گوں کرمان ءُ سیمی بهر گوں هرمزگاں  هوار کنگ بوت۰ آ بلوچ مروچی په ترمپے ورگی آپ مهتاج انت۰
امینی فرد شَرّ زانت که هنوگیں استان بلوچستان ءِ ٹکرٹکر کنگ په بلوچ را ج ءَ مزنیں تاوانے ایت۰ بلئے آ په درآمدیں سپاه ءُ دژمن ءِ نپ ءُ سیت ءَ وتا ندریگ کتگ ءُ پگری گلام ءِ رِڈّیں درورے اِنت۰ امینی فرد چه راج ءَ سستگ ءُ بلوچانی راجی پجّار ءِ دژمن ءُ ڈیه ءِ بدواه انت ۰

درآمدانی جاسوس ءُ چگلاں

هما دمگی ناشراں که  په ایرانی واکداراں چگلی کته ءُ ماں بلوچانی ڈیه ءَ  درآمدانی جاسوس  بوتگنت   راجی جنزءَ بے کچ ءُ کساس تاوان داتگ۰ چگلانی دیم سیاهی ماں بلوچ راجدپترا مانیت ءُ بلوچ ءِ پدریچ آهاں مدام پٹ کننت۰

گوں چگلانی همکاری ءَ بلوچ اوبادگانی بازیں سرگڈگ بوتگنت۰  په درور شهید رحیم زردکوهی، شهید بی بگر زردکوهی، شهید حاج بلوچ خان سمالزی (شه بخش)، شهید مولوی عبدالرئوف ریکی،   شهید ابابگر ریکی ءُ شهید مولوی جلیل کمبرزی جاسوساں کوشارینتگ انت۰  ناشریں چگلاں ماں دشمن ءِ بلوچ دژمنیں کارکردءُ  په راج ءُ گلزمین ءِ ایردست دارگ ءَ "شریک جرم" انت۰
محمد کریم بلوچ
نوامبر  ۲۰۱۷