بیست ءُ هپت مارچءِ تهاریں روچ
انگریزءُ پنجاپ ءِ لشکر بیست ءُ هپت مارچ سال ۱۹۴۸ آزات بلوچستان ءِ سرا هلگر کت ءُ گوں کلات ءِ گِرَگ ءَ بلوچ ڈیہ ءِ رودراتکی بهر اِش آوارجت۰ اداں اے گپ نبیسگی انت کہ رودراتکی بلوچستان یازدہ اگست سال ۱۹۴۷ ءَ وتی آزاتیءَ جار جتگ اَت۰
پاکستان رند چه بلوچستان ءِ "اعلان آزادی " ءَ اڈ بوت۰ بلوچستان ءِ بیانیه آزادی یازدہ اگست ۱۹۴۷ءَ ماں رادیو دھلی ءَ وانگ بوت ءُ هم چه "نیویورک تایمز" ءَ ھم شنگ ۰بوت بیانیه آزادیِ بلوچستان ءَ انگریزان ءُ هندوستان نُهم آگست ھما سال بزان ۱۹۴۷ءُ مَنّتگ اَت ۰
وت مستریں بلوچستان ءِ سیاسی سروک هور گوں خان کلات میر احمد یارخان ءَ هشت ماه ءِ درگت ءَ وتی دو دیوان بزاں " دیوان عام" ءُ "دیوان خاص" گچیں کرت انت ءُ مُلک ءِ کانودءُ بُن رهبند اِش هم نبشته کرت۰ بلئے انگریزءُ مسلم لیگ هورگوں چنت ردوارتگیں بلوچ سردار (جام بیلہ، سردار ھاران ءُ گچکی یانی سردار) وت مستریں بلوچستان ءَ رند چه هشت ماه ءِ وتمستری پروش دات. مئے چنت ھزار سالیگیں راجدپترپیش داریت کہ اے اولی رند انت سرزمین بلوچستان ءُ بلوچ راج پنجاپ ءِ ایردست بوت۰
پنجاب ءِ لشکر بلوچستان ءِ پُرّیں ھزانگ ءُ ھنبار پُل اِتنت ءُ جناح ءَ ھکم دات تاں ھان کلات واجہ میراھمد یارھان ماں کلانچی (کراچی) ماں وتی لوگ ءَ بندکنگ بہ بیت۰ ھما درگتءَ ھدامرزی بیزنجو گوشتگت: " بلوچستان ءِ ھورترینگ گوں پاکستان میلیوناں بلوچءِ زندءِ بربادی ءُ پاھوءِ ھکم انت."
محمدکریم بلوچ
مارچ ۲۰۲۰