وزارت ارشاد ءِ بلوچ دژمنی

 هدامرزی  گل محمد صالح زهی ءُ هدامرزی محمد اشرف سربازی بلوچستان ءِ دو کَلاّنیں ندکار، شائر ءُ ادیب اتنت۰

آهاں دُزّآپ ( زاهدان ) ءِ رادیو بلوچی ءِ بنگیج کار اتنت ءُ بلوچی زبان ءَ سک باز هزمت اِش کرت۰

اداں په بلوچی زبان ءِ هاترا ءُ آ دوئیں هُدامرزی یانی یات ءَ چنت گپ دیما آرگی انت۰

اول ایش که رند چه ۱۳۵۷ ه.ش.  رادیو بلوچی ءِ مزنیں آرشیو درآمدانی دستا کپت۰ 

ناشریں زابلی ءُ هکومت ءِ "وزارت ارشاد" اے آرشیو ءَ که په بلوچی زبان ءَ مزنیں گنجے آوار جتگ ءُ چیر داتگ۰ 

دومی گپ ایش که هدامرزی  گل محمد صالح زهی ءِ  چنت کتاب ءَ وزارت ارشاد په چاپ ءُ شنگ کنگ ءِ نیمون ءَ هپت سال پیش پہ رپک ءُ پندل چه واجه  ءِ دستا در کتگ انت۰

واجه ءِ بے دًروًریں نبشته کتگیں کتاب "تاریخ بلوچستان"   که گیش چه دوهزار ( ۲۰۰۰)  تاکدیم انت هم زابلی ٹولی ءُ وزارت ارشاد ءِ  دستا انت۰ دلگوش گوَر کنگی انت کہ ھمے کتاب ءِ بھرے "ملک نامہ" انت۰ "ملک نامہ" بلوچستان ءِ مًلِکانی باروانت کہ بلوچستان ءِ راجدپترءِ پٹ ءُ پول نہ بوتگیں بھرے. 

هور گوں همے کتاب ءَ با زیں راجدپتری کاگد ءُ "سَنَد" کہ ھدامرزی صالح زھی ءِ دستا بوتکنت هم گجراں برتگ انت۰ گجر ءِ وزارت ارشاد  بلوچی زبان ءِ دیمروی ءِ دیمپان انت. بلوچشائر ءُ ندکارانی کتاباں چاپ ءُ شنگکاری ءِ مهن کنگ ءُ  آوار جنگ ءِ مستریں مکسد مئی راجی پجّار ءِ کار کنگ انت۰

بید چه هدامرزی  صالح زهی  ءُ هدامرزی  اشرف سربازی ءِ کتاب، نبشتانک ءُ شئیر  وزارت ارشاد ءَ  دگه ندکارانی کتاب هم آوارجتگ انت ءُ بلوچ ندکاراِش مجبور کتگ انت تاں بے   توار بنت۰

گڈسرا گوں واجهاں دکتر عظیم اسمالزی( شہ بکش)، عبدالوهاب ایرانژاد، دکتر محمودزی،  عبدالسّلام بزرگزاده، پیربکش ملارهی، محمود براهویی نژاد ءّ ڈیه ءِ تمامیں زباندوستان گوشگی انت که هدامرزی گل محمد صالح زهی ءُ هدامرزی اشرپ سربازی ءِ گنجیں میراس  پد جنگی انت تا ں وزارت ارشاد ءُ زابلی یانی کینگانی آماچ مه بنت۰

اکتبر۲۰۱۹

محمد کریم بلوچ