دِزَّکءُ ھُشَّکءُ گـُشت ءِ

شھیدانی نام ءُ یات ابدمان اَنت

سال ۱۳۰۷ هجری شمسی ( نوامبر ۱۹۲۸ میلادی) ءَ گجرءِ لشکر گوں انگریزءِ همشوری ءُ کمک ءَ رونشتی بلوچستان ءِ سرا هِلگر کرت۰ ماں آ هلگرءِ بنگیج ءَ گُشت، پسکوه، هُشَّک ءُ گنجیں دِزَّک گجرءِ انسان دژمنیں جنگی کارکرد ءِ آماچ بوتنت۰امان الله جهانبانی ءِ همآ دوارسوچیں هلگرءِ باروا نبشته کتگیں کتاب " عملیات قشون در بلوچستان" پیش داریت که گجرءِ لشکر چونکا کامیاب بوت تاں بلوچ ڈیه ءَ آوار به جنت ءُ بلوچاں ایردست بکنت۰

آهانی سُوب ءِ مستریں سَوَب نئے  ناشریں گجرانی زور ءُ رستری بلکیں رُمبے چه بلوچ سردارانی ناتپاکی گوں میر دوست محمد هان اَت۰ انگریزءُ گجرکامیاب بوتنت تاں بلوچانی تپاکی ءُ یکویی ءَ باز نزور بکننت۰

امان الله جهانبانی ماں وتی کتاب ءَ نبشته کتگ که رند چه دِزّک ءِ جنگ ءَ بلوچانی لشکر نزور بوت ءُ بلوچ سردارانی ناتپاکی په آهاں دادے اَت۰ هما ناتپاکی ءِ سَوَب ءَ کلا سِب، کلا مه گس، کلاسرباز، پهره،  گنجین بنپور، گِه، چامپ، گنداوگ ءُ  لاشار بید هچ جنگے آوار جَنَگ بوتنت۰ 

اداں هما بلوچ سردارانی نام گِر کنگ که په جهانبانی اِش نپر ءُ کاسد راه دات ءُ میر دوست محمد هان اِش سھتی ءِ روچاں تهنا هِشت زلوری نهنت بلئے ما را زانگ لوٹیت که مئی ناتپاکی ءُ ناشریں دشمن ءِ پلینڈ ی ءُ لدیگی کارکرد  ما را په اے هال ءُ روچ رسینتگ۰  

مروچی گجرءِ لدیگی سپاه ءُ لشکر سَکْ شیرَک ءُ تِرِّن انت ۰آ بلوچ راجءِ زند جاوران  چه جهندم ءَ گنتر کتگ اَنت۰ مئی ورنایاں  جننت، کُشنت ءُ زندکا سوچنت۰ترورستی سپاه دو لکّ ءَ گیشتر تپنگ ماں بلوچ ڈیہ ءَ شِنگ کتگ ءُ همُک روچ بے گناهیں بلوچ گوں همے تپنگاں کُشَگ ءُ زدگ بنت۰ هزاراں بلوچ پت ءُ مات ءُ گهاراِش سوگیگ کرتگ انتءُ بے شمار چُکّ اِش چورہءُ یتیم کتگ انت۰

ھنوگیں جاوراں درآمدانی دیم گوں تپاکی ءُ سیستماتیکیں جھداں دارگ بیت ءُ اگاں تپاکیں بلوچ بہ لوٹنت ناشریں گجرءِ لشکر چہ بلوچ ڈیہ ءَ گلینگ ھم بیت۰ 

بلوچستانءِ شھیدانی کربانی یاں ھچ بر مہ شموشین ءُ پہ وتی ڈیہ ءُ راج ءِ پدریچانی ھاترا وت ماں وتی اڑ ءُ جنجالاں یکّ کِرّ ایرکنین ءُ دیم پہ آزادی ءُ وت مستری دیما بہ رویں۰

نوامبر ۲۰۱۹​ 

محمد کریم بلوچ