ناشریں گجرءِ بے اَندازیں

 بلوچ دژمنی

گوستگیں روچانی هورءُ هار ماں بلوچ سرزمین هزاراں بلوچ ءِ زندهال چه پیسرا گران تر ءُ گنتر کتگنت۰ البت گجرانی کارهرابی ءُ بے کساسیں بلوچ دژمنی هورءُ هار ءِ آماچیں بلوچانی سکی ءُ سوری یاں  مَستر ءُ گیشتر کتگنت۰ 

 اداں چنت درور چه لدیگی گجرءِ زوالکاری یاں آرگ بنت۰

ـ * چه هورءُ هارءَ په بلوچانی نزور کنگ ءُ کُشَگ پائده چست کنگ۰
ـ * زیردانءِ آپ بند ءِ پچ کنگ تاں دشتیاری ءِ بلوچان گیشتر تاوانبار بنت۰
آوهدءَ  که مُلک ڈکّال اَت اے ناشراں زیردان ءِ آپ یله نه کت ءُ بلوچانی کشت کشار ءُ مالداری اِش سکّ باز تاوان دات۰ هنوں که هورءُ توپان انت ءُ دشتیاری ءِ میتگان هار ءِ آماچ انت ناشریں گجر ءِ سپاه زیردان ءِ آپ یله کتگ تاں بلوچاں گیشتر مالی ءُ جانی تاوان بد نت ءُ بلوچ میتگاں ماں لهڑآپ ءَ به بُڈانت۰
ـ * بلوچ کمکارانی ءِ هلاپ ءَ کارکنگ ءُ مردمی کمکانی اوشتارینگ ءُ  آوار جنگ
ـ * مردمانی جم کتگیں کمکاں دُزّگ ءُ ماں مزنیں شهراں بها کنگ ءُ چیزے ءَ  په سپاه ءِ نام بهر کنگ
ـ *په تاوان دیستگیں مردمانی کمک کنگ ءِ نیمون ءَ  چه هَزگاریں بلوچاں په زور زرّ گِرگ
ـ * پاسدار مارانی، موهبتی ءُ گشتاسپی ءِ دست مانجنی مان بلوچ  کمکارانی هشرکاری

بلوچ مهلوک رند چه گُشت ءِ زمین چنڈ سال ۲۰۱۳  ءُ هما سال  ءِ هور ءُ هار شَرّ دیست که گجر بید چه دروگ ءُ پندل  ءُ مهتاجیں مردماں گیشتر تاوان دیگ ءَ دگه کارے نه کرت۰ گجرسال ۲۰۱۳ میلادی ماں گشت ءُ شستون زمین چنڈ ءِ آماچیں مردماں کمک نه کرت ءُ هنوں ماں زرّآباد، جاشک، دشتیاری، بشکرد، لیردپ، گابریگ، اورکی، گِه، بنت ءُ دگه سدانی سد هارجلّیں میتگانی مردماں کمک نه کنت که هچ بلکیں چنت رند کمکارانی دیم اِش داشتگ ءُ جم بوتگیں کمک اِش وتیگی کتگ ءُ دزِّتگنت۰  

 په گجر ءُ گجرانی لشکر ءِ کمک وداریگ مه بئیں آ چه بلوچانی تاوانبار بیگ ءَ رازی انت۰ ناشریں زابلی ءُ ڈنگیں گجرانی دگه ٹاهینتگیں ٹولی که په کمک جم کنگ ءَ مردمان ریپینگنت پاشک بکنیں۰

ما را دلجم بیگی انت کہ بلوچا ں بید چه وت دگه دوزواہے نیست۰ لدیگی گجر مئی بیگواهی ءُ گاری ءَ لوٹیت ءُ بس۰

 تاوان دیستگیں برات ءُ گهارانی کمک کنگ پہ دلجمیں وڑے تمامیں بلوچانی انسانی ءُ راجی اُگده انت۰

محمد کریم بلوچ

ژانویه ۲۰۲۰