!کم دَزرَس ءُ مُهتاجیں مردمانی هیالداری مئے انسانی ءُ راجی اگده انت 

بلوچستان ءِ هما مردم که کم دَزرَس ءُ بے وَس اَنت هنوگیں گژن ءُ واری ءِ "سونامی" ءَ سکّ بدھال ءُ بے واڑ کتگ انت۰ گژن ءُ واری ءِ سونامی یک اناگتیں گپے نهنت، اے بهرے چہ رستریں ایرانی واکدارانی بلوچ دژمنیں سیاسی پندل اِنت کہ بلوچاں وار، ایردست ءُ چمدار بدارنت۰ 

ایرانی زورگریں واکداراں بلوچستان ءَ وتی لدیگی لشکر ( سپاه ) ءِ دستا داتگ بزان مئی آوارجتگیں ملک ءِ هاکم  هنوں امان الله    تاسبی" نامیں گجرے!

آ ھونوار ءُ ڈنّی  سپاہ ءِ کار مستر اِنت ءُ چه گچساران ءِ شهرِ ، بلوچستان ءَ آرگ بوتہ تاں ایرانی واکداراں ز وتّر پہ وتی شومیں مکسداں بہ رسینیت۰ بلوچانی کشت کوش ءُ ڈیہ راجی مال ءُ مَڈی یانی پل ءُ پانچ رستریں گشتاسبی ءِ  ھُکم اَنت.

لدیگی سپاہ ءُ وتسریں زابلی گوں ناشریں گشتاسبیءِ سروکی ءَ بلوچستان ءِ کارباری جاوراں باز ھراب کتگ انت  ءُ بلوچانی زند جاوران اِش  سک نگیگ کرتگ اَنت۰

ملک ءِ ھزاراں ورنا کار نیست ءُ گیش چہ دو لکّ بلوچ کودک چہ وانگ ءُ نبیسگ ءِ یاتگیری ءَ زبهر انت۰ وانگجاھاں گوں جاھلیں زابلی مدیر ءُ کینگی استاد بے استاندارد ءُ پہ بلوچ نودربراں شزاجاہ انت۰ 

سدانی سد  بے وسیں مردم ماں پُر گنجیں بلوچستان  شُدّ کَشگ انت ءُ اے لاچاریں مردم کہ سکّ دس تنگ انت گوں  نیکوکاریں  مردمانی کمک ءُ مَدتاںءَ وتی زند گوازینگاینت۰

ڈیہ ءِ باز جاگهاں  انساندوستیں بلوچ کمک کار ھمے مهتاجیں مردم ءُ گریبیں نودربران ھیالداری ءُ گَوَرکنگاینت۰ بلئے ناشریں ھاکم بزاں گشتاسبی گوں ڈنّی یانی لشکر ( سپاه )  چہ بلوچانی ھشرکاری ءُ ڈیہ ءِ گریباں گَوَر کنگ ءَ ناراز ءُ تکانسراَنت۰

آ لوٹنت بلوچانی انسان دوستی ءُ کمککاری هم ءَ  کنترول بکننت! ھال رستگ کہ پارس ءِ لدیگی لشکر ءُ چاروگاں کمککاریں مردم جست پرس ءُ دِلسیاہ کنگاینت۰ آهانی بانکی هساب بندانت  ءُ جم بوتگیں زرّی کمک اوشتارینگ بنت ءُ وت اِش دست گراَنت. پارس لشکرءُ ڈنّی یانی مکسد ایش انت کہ کمککاریں بلوچ ملک ءِ گریبانی کمک کنگ ءِ جاگہ ءَ کچکول ءَ بزورنت ءُ پہ ھکومت ءِ پنڈوکی ادارہ یاں بہ پِنڈاَنت۰

هور گوں راجی جهدانی دیم ءَ برگ ءَ په گهتریں بانداتے باید انت ما  هروڑ ءَ که بوت کنت ملک ءِ کم دزرس ءُ مهتاجیں مردم تچکاتچک( مستقیم ) کمک  به کنیں

.

محمد کریم بلوچ

ژوئن ۲۰۲۰