!بلوچ راج وڑوڑیں شزا ءُ ازابانی آماچ اِنت

. بیست ءُ شش(۲۶) جون( ژوئن) شزا ءِ هلاپ ءَ جهانی روچ انتءُ بلوچ راج درآمدانی وڑوڑیں  شزا  ءُ  ازابانی آماچ انت. 

 لدیگی واکدارانی همشـوری ءُ هرپيمیں همکاری چه ۱۹۴۸ ءَ بگـر تاں مروچـی بلـوچ راجدپتـرءِ تهاريـں بهرے انـت.  

اے اولـی رند انـت که بلـوچ راج ماں يـک دؤرے بـزان هنوگيـں دؤر پارس ءُ پنجاپی يانی ايردست انـت.  مـاں بلوچستان ءِ کْـوَهـن ءُ دراجيـں تاريـخ ءَ اے اولـی رند انـت که پارس ءُ پنجاپی هوری ءَ مئـی وتـن ءُ هنکيــں آوارجتـگ ءُ هنچـوش په مئے ملـک ءِ وتيگــی کنگ ءَ تکانسـر انت که گوشينـئےبلوچ گلزميـن آهانی پـت ءُ پيروکانـی ميـراس انـت.

چه ايرانـی ءُ پاکستانـی سرکماشانی ديوانان ءُ دوئيـں انگريزءِ اڈکتگيں ملکانی وزيرانی گندنند ءُ گپ تـران  بگـر تان آهانی چگلـی اداره يانی هوريـں  جاسوسـی همـا بلوچ دژمنيں  کارکردانـت که په آوارجتگيں  بلوچستان ءِ زوربرد کنگ ءَ جاری انت.  چه سپاه ءُ پنجاپی پئوج ءِ همکاری تاں مئی ورنايانی دسگر کنگ ءُ کشگ، چه بلوچستانءِ مال ءُ مـڈيانی ءِ پل پانـچ ءَ بگر تـاں  ما را  وڑوڑیں ءُ  شزا ءُ ازاب ديگ  تهران ءُ اسلام آباد ءِ همکاری ءُ همشـوريانـی شوميـں بروردانت

 انسان دژمنيـں واکدار وتـی هونوار ءُ بلوچ کشيـں شزاگـر، بـے لـگاميــں لشکر ءُ  چـگـل ءُ پئوجی مـاں بلـوچ گلزميـن ءَ يلـه کتگ اَنــت تاں بلوچانـ کشت کـوش ءُ لـٹ کـٹ به کننت.

هزاراں بلوچ پاکستانـی ءُ ايرانی واکدارانی دستا کشگ  بوتگ ءُ بـے شمار ٹپی ءُ زدگ بوتگنــت. نامالوميـں شمارـے دسگر ءُ بيگـواه کنگ بوتگنــت که مـاں فاشيستانی کورچات ءُ شزاجاهـاں بنديگ انـت. پارس ءُ پنجاپـی شـزاگــر وڑ وڑيـں  شـزا ءُ ازاب بلوچ بنديگان دينـت ۰ 

:لهتيـں چه انساندژمنیں ءُ سـاه سنـدوکيـں شزاياں که میلیونان بلوچ آهانی آماچ انت  ایش انت

 بلوچ بنديگانی  جـاناں گـوں کارچ ءُ چاکـو بـرگ ءُ درّ درّ کـنـگ1-

۲ـ بندیگانی  دست ءُ پاداں، چنگلان، گوش ءُ پونزانی بـُرگ

۳ـ بنديگ ءِ سـرا آپ ءِ چيـر دارگ

۴ــ درنجگ گوں يک دست يا که دوئيں دست

۵ـ درجنگ گوں يک پاد يا که دوئيں پاد

۶ـ پادانی چيرا گوں هيزران ءُ شيپاگ جنگ

۷ـ دست ءُ پاداں بندگ ءُ گرماگـی روچ ءِ سـرا دؤر ديگ

۸ـ دسـت ءُ پادانـی ناهنـاں کشـگ

۹ـ ناهنانی چيرا سوچـن بـُک ديگ

۱۰ـ داگ کنگ ءُ سوچگ گوں باز گرميں آسن، داری اشکـر ءُ سيگارءِ اشکر

۱۱ـ بنديگانی دست، پاد؛ باسک ، سر ءُ سينگاں ءَ تيرجـَنـَگ

۱۲ـ دپ ءُ چمانی بندگ گـوں چسپ

۱۴ـ دسـت ءُ پاد ءُ گـردن ءَ سـک تاب ديگ

۱۵ـ دراجيں سوچين ( گوالدوچی سوچـن ) ماں باسک، سينگ ءُ لاپ ءَ بـکّ ديـگ

۱۶ـ نزيکيں وارسانی دسگر کنگ ءِ پاترپ ديگ

۱۷ـ بنديگانی نزيگين سياد ءُ وارسانـی دسگرکنگ ءُ ازاب ديگ ءُ کشگ

۱۸ـ دست ءُ پادانی چوپگ ءُ پروشگ گـوں کـُدينــگ ( چکش )

۱۹ـ بنیگانی سر ءُ دیم ءُ جان ءِ سرا تيزاپ ريچـگ

۲۰ـ جان ءِ سرا لهڑیں آپ ريچـگ

۲۱ـ بنديگ ءِ سـرا ماں سرديـں آپ بــُّک ديگ ءُ چير آپ دارگ ءُ درکنگ هنچو که بنديگ به توسيت  .

۲۲ـ بندی ءِ پادانی ميانجين ءَ ( .... سرا ) گرانين سنگ بندگ ءُ لونـج کنـگ

۲۴ـ بندی ءِ جان ءِ سرا ناروائين ءُ رستری کار کنگ

 ۲۵ـ بندی ءِ سـرءُ ديمـا پلپـل ( مـِرچ ) لگاشـگ

۲۶ـ بنديءِ دست يا پاد ءِ چنگلاں ( لنـکـُـکاں ) گــُــڈگ

۲۷ـ بندی ءِ جـانءَ کرنـٹ جـَنــَگ

۲۸ـ بنـدی ءَ گـوں کرنٹــی پستول جَـنــَگ

۲۹ـ ریش ءُ دروت ءُ مودانی گـْـوَجـَـگ

ـ۳۰ سرءِ مودان ءُ ريش ءُ بروتان ءَ سوچينـگ ءُ بنـدی سـر ءُ ديما پيلـوشينـگ

۳۱ـ ٹپانـی سرا واد ءُ پلپل ريچگ

۳۲ـ ماں بنديجاه ءَ بندی ءِ چکانی  فيلـم ءِ پيشـدارگ

۳۳ـ بنـدی ءِ ٹپانـی کـُـدينـَـگ

۳۴ـ بنـدی ءِ درنجـگ ءُ لونـج کنـگ

۳۵ـ بنـدی ءَ گـوں بستگيـں چمـّاں چه بـرزگے ءَ دؤر ديـگ

۳۷ـ بنـدی ءِ توسينـگ چـه بازيـں لـٹ کـٹ ءُ شـزاياں

۳۸ـ شپانی نيم بنـدی ياں چـه واب پدرهينگ گـوں وڑوڑيـں کوکار ءُ سلوات ءُ دژمان ( زا )

۳۹ـ ماں بنديجـاهءَ مارءُ زوم يله کنـگ

۴۰ـ بنديگيــں بلـوچ جنيــن آدمانی شــزا ءُ ازاب ديــگ مرديــں بنديگانی ديمــا

۴۱ـ بنديگانـی چمـاں په دراجيـں مدتـے ءَ بنـدگ

۴۲ـ بنديگان ءِ کور کنگ

۴۳ـ ماں سردی موسم ( زمستان ) ءَ بندی يان ماں سارت ءُ تهاریں کورچاتاں دؤر ديـگ

۴۴ـ ماں گرماگ ءَ بنديگاں ماں باز گرم ءُ کسانیں ازابجاه ءُ  کورچاتان بندی کنگ.

۴۵ـ بندی يان سوچن ( انجکشن) جـَنـَگ ءُ په نشئه ای دوا هيلدار کنگ

۴۶ـ بندی يان ءِ ورگانی ته ءَ هيلداری دوا ريچگ

۴۷ـ بندی يان چه وپسگ ءَ مهــن کنگ

۴۸ـ پهلوگانی پروشگ گوں سـرلگت ءُ لـٹ جنگ

۴۸ـ بنديگانی سياد ءُ وارسانی گـِرگ ءِ پاتــرپ

۴۹ـ بنديانی چک ءُ لوگ مردمانی کشگ ءِ پاترپ

۵۰ـ بدی ءِ مردمانی  کشگ بندی ءِ چمانی ديم

۵۱ـ بنديگان ءَ گـوں درچـک ءُ مچانـی کنـٹ مـُهـر بنـدگ

۵۲ـ ٹپی يـں بنديگان ءَ تگردانـی تلا پيچگ ءُ مـان کوه ءُ پٹاں دؤر ديـگ

۵۳ـ ٹپی ءُ زدگيـں بنديگان ءَ چه پئوجی هلی کاپترانی سرا دؤر ديـگ

۵۴ـ بنديگانی کماشيـں پتانی لٹ کٹ ءُ دُوا دُژمان

۵۵ـ ماتانی دسگـر کنـگ ءُ لٹ کـٹ کنگ ءِ پاترپ

۵۶ـ بندی ءِ دپ ءُ دنتاناں پروشـگ

۵۷ـ بندی ءِ شزا ديگ ءُ کشگ دگه بنديگانی ديما

۵۸ـ بندی ءِ گـُد ءُ پـُچـّاں چه جان ءَ در کنگ

۵۹ـ بنديگ ءِ سر ءُ کامپک ءَ گـوں ڈوک، دار يا کدينه ءَ پروشگ

۶۰ـ بنديگ ءِ سـرءِ مـوداں تراشـگ ءُ آيی ءَ مـُهــر بندگ چوش که وتا را هچ سرينت مکنـت

 گـڈا پـٹ پـٹ سارتيـں آپ بنـدی ءِ تراشتگيـں کـُبــّـه سـرا ريچـگ

۶۱ـ بندی ءَ چه دزنماز گرگ ءَ مـَهن کنگ

 ۶۲ـ بندی ءَ چه نمـاز ءَ مـَهن کنـگ

۶۳ـ بنديگيـں بلوچ مولـوی ياں کاپَـر ءُ بـے ديـن گوشگ

 ۶۴ـ بنـدی ءِ دپ ءُ لنـٹـاں دوچـگ

۶۵ـ بنـدی ءِ سـرا پلاستيکـی تـورگ ءَ مـاں لگوشـگ ءُ مـُهـر بنـدگ هنچـوش که بنـدی نپس کش اِت مکنـت ءُ به توسيـت

۶۶ـ بنـدی ءِ گٹ ءَ مـُـهـر گـوں دست دارگ ءُ پرنچـگ بزاں گٹ تروس کنــگ

گـوں ساد لـوپ کنگ ءُ زميـن ءِ سـرا کشـّـگ

۶۸ـ بندی ءِ سـرين ءُ پشـت ءَ گـوں سهريـں آسن ءُ سيم داگ کنگ پدا هما داگ بوتگيـں جاگهاں کـُدينـگ.

۶۹ـ شـزا ءُ ازابانی چيرا بندی ءَ جست ءُ پـرس کنگ

۷۰ـ بنديگان ءَ چپت ءُ چوپ کنگ گـوں مشت ءُ سرلگت

۷۱ء بلوچ ورنایا ں زندکا سوچگ

۷۲ء  گوں بلوچ شیرزالاں زیادتی کنگ

۷۳ء بندیگیں بلوچانءِ گهار یا جنکانی دُزَگ ءُ بندیگ کنگ.

۷۴ء امیت داریں بلوچ مات ءُ گهارانی کُشگ ماں  نادراهجاهاں

۷۵ء بلوچ نُنُکانی توسینگ ءُ گٹ تروس کنگ

۷۶ء کرونا ویروس ءُ دگه بیماریانی تالاں کنگ ماں بلوچستان ءَ

۷۷ء بلوچانی لوگاں لُمبینگ

۷۸ء بلوچانی لوگاں ماندارگ

۷۹ ء بلوچستان ءِ مچکدگ ءُ کشاراں ماندارگ

۸۰ء بلوچستان ءُ بلوچ راجءِ زندجاوارانی تباه ءُ ویران کنگ

بلـوچ راج هنـوں ایردست ءُ بنـدیگ اِنت. درآمداں لوٹنـت تاں گـوں چشيـں شزا ءُ ازاباں ما را مدامـی وتی ايردست ءُ گـلام بدارنـت. همـا شزا ءُ ازاب که ماں دگنياءِ هچ ملک ءُ هَنـدے ءَ بيد چه بلوچستـان کاربندگ نه بنت. هما شزا ءُ ازاب که شزاگريـں ڈنـّی يان ءِ انسان دژمنی ءَ پيش دارنـت. 

بلئـے اپسوز که ايران ءُ پاکستان ءِ انسانی هکانی پدجنوک هم وتی دپاں وت بے تـواری ءِ گرانيـں کـُبلــے جتـگ ءُ بلوچستان ءِ  بنديگانی ازاب کوش بيگ ءِ باروا کـه ماں ايران ءُ پاکستانـی کورچاتان بند انـت،  بـے تـوار اَنـت.

بلوچ شهيـد ءُ بنديگانـی شمار چه هساب کتاب ءَ دراَنـت. هچ بر جـار جنگ نه بوتگ که مـاں گوستگيـں نود ءُ سئے سالاں چنت هـزار بلـوچ  گجر ءِ رستری کارکرد ءِ آماچ بوتگنـت ءُ چه ۱۹۴۸ ءَ تان مروچی چنت هزار بلوچ پنجاپ ءِ هونواریں واکدارانی دستا شهيد کنگ بوتگنـت. هچ کس ءَ مالوم نهنــت که چنت هزار بلـوچ ماں ايرانی ءُ پاکستانـی کورچاتاں بنديگ کنـگ ءُ شزا ديگ بوتگنـت.

مـاں رودراتکی بلوچستان ءَ گلزمين ءِ کوه ءُ پـٹ ءُ کوچگ شاهد ءُ گواه اَنـت که پنجاپی رستر گون بلوچ راج ءُ بلوچ اوبادگان چـے زلم ءُ زوراکـی کنگاينـت. راج ءِ بيگواه کتگيـں جهدکار ءُ کلانيـں ليـڈرانی زدگيـں، ٹپی ءُ پروشتگيـں، شـزا ءُ ازاب ديستگيـں شهيـدی لاش ءُ جنازه ياں مـاں شاهگانيـں گلزمين ءَ شنگ ءُ تالان کنگ بنت. اے انسان دژمنـی ءُ رستری کارکـرد درآمدانی هوريـں بزان مشترکيـں پندلے انـت۔

مـاں ايـران ءِ آوارجتگيـں بلـوچستـان ءَ مئی انسانـی هکـاں هنچـو  لگتمال بوتگنـت که هر پاسدار يا که بسيجی ما را بيـد جسـت پرس ءُ بيد هچ ميارے تيرجننت ءُ کشنـت یا کہ زندکا سوچنت!  مـاں رونشتی بلوچستان ءَ هکومتـی سرباز بسيجی يا پاسداران په بلوچانی کشگ ءَ تيرجـَنگ ءِ اجازت هست .  نود ءُ سئے سال انت کـه مئی ننکان ءُ گوانزگی تبل، ورنا ءُ پيـر، .جنين ءُ مرديـں ايرانی فاشيستانی دستا کشگ بيگاينـت.

گجر فاشيست ءُ پاکستـانی واکداراں بلوچ ورناياں دسگـر کننت ءُ يکدگرا دينت که رنـد چـه بازين شزا ءُ ازابان کشگ بنت.

مـاں رونشتـی بلوچستان ءُ رودراتکی بلوچستان ءَ بـے کانـودی ءُ بربريت هاکم انت. هـر زيادتـی ءُ بلوچ دژمنيـں کارے که په درآمدانی نپ ءُ سيت انت کانود ءِ نام اِش  پـرکرتگ انـت۰ ايران ءُ پاکستانی نام نهاديـں کانوداں بلوچانـی زنـد ءُ بلـوچءِ راجی 

.وجود ءِ هلاپ اَنـت

آزات ءُ آباد بات گنجیں بلوچستان 

محمد کریم بلوچ

 2020 (بیست ءُ شش(۲۶) جون( ژوئن