گلزمین ءِ تلاهیں کوه

جنوری سال 2016 میلادی ایرانی میدیاے ءَ جار جت که ماں "زاهدان" بزاں دُزآپ ءِ نزیکءَ تلاهیں کوهے هست ءُ چنت ماه ءَ رند هال اِش دات که ایرانی کواس ءَ انجنیر اں (مهندسین ایرانی) چه کوهءِ ڈوک ءُڈَلاں بازیں تِستے گپتگ۰ آ تِستاں پیش داشت که ماں گلزمین ءِ آ کوه ءَ همینکه سُهر ءُ تلاه هست که ایرانی یاں دگه جاهءَ هچ بر نه دیستگ.

بوت کنت که اے ایشیاےءِ مستریں سُهر ءِ هزانگ به بیت.

اداں گوَشگــی انت که اے کوه بزمان ءُ دزآپ ءِ نیام انت ءُ هنون ایرانی لشکر ءُ رستریں سپاهی اوداں چاروگی کنگاینت ءُ پارس سرمایه دار بلوچانی اے مزنیں مال ءِ پل ءُ پانچ ءَ گلائیش انت.

اگاں چے ایرانی میدیا چه گل ءَ بال بوتنت ءُ هر واننده یا ناوانندئیں درآمد بزاں پارس چه بلــوچ گلزمین ءِ اے مزنیں هزانگ وت سرا هساب ءُ کتابے دات بلئے راستیں گپ ایش انت که گلزمین ءِ اے سُهرءِ هزانگ بے درور انت۰

ماں گلزمین ءِ اے کوه ءَ سهرءُ تلاهءِ کساس ماں هَمُک تُن (ٹن) ڈوک ءُ ڈَل دو گِرَم انت۰ البت په سهر ءِ در کنگ ءَ باید انت اے ڈوک پروشگ ءُ هورت کنگ به بنت ءُ گوں برزیں حرارت بزان گیش یک هزار ءُ شست ءُ چار(C° ۱۰۶۴،۴۳ ) درجہ ءَ گرم کنگ به بنت تنکه سُهـرءِ جِند آپ به بیت ءُ رندا چه ڈل ءُ ڈوکاں درآرگءُ جتا کنگ ببیت۰

همے باروا بدیں هال ایش انت که ایرانی واکدار ءُ گئیر بلـوچانی خصوصی کمپنی دست ماں دست داتگ ءُ بلوچانی اے سُهرءِ هزانگ ءَ دزگ ءُ پل ءُ پانچ گنگاینت۰

ایرانیانی سلهبندیں سپاهی ءُ تروریستی سپاه هم آهانی پاسبان ءُ چوکیدار اَنت ءُ ماں اے مزنیں دزّی ءَ شریک انت۰

هنـــون اے هزانگ ءِ بے دروریں ڈَل ءُ ڈوک چوش که بزمان ءِ تلاهیں شَند ءُ هاک، پَنّوچءُ نیلگ ءِ ڈوک، تپتان ءِ معدنی ڈوک ءُ کوه بیرک ءِ آسن ءِ ڈوک چه بلوچ ڈیهءَ لڈگ ءُ دیم په کرمان ( کارخانه سرچشمه مس در کرمان ) ءُ اصفهان ( کارخانه ذوب آهن مبارکه اصفهان ) ءَ بَرگ بَنت.

بلوچستان ءُ بلوچ ءِ اقتصادی پدمنتگی ءِ یک مزنیں سوبے همش انت که درآمداں مُلک ءِ راجی سرمایه یاں شپ ءُ روچ پل ءُ پانچ کنگاینت ءُ گوں زورانسری ءُ لدیگی کارکِرداں بلوچ راج اِش چه وتی مال ءُ نیامتاں زبهر کرتگ‌

محمد کریم بلوچ