بلوچ ھژار

پاکستانی لابی ءُ پنجاپی ٹولی یاں ماں امریکا ءُ اروپاے ءَ چست ءُ ائیر کنگاینت تاں رودراتکی  بلوچستان ءِ راجی جنزءِ جھدکاراں گوں تروریستی سپاہ قدس ءَ ھم شور ءُ ھمکار پیش بدارنت۰ 

رند چہ ایش کہ امریکاےءِ واکداراں سپاہ پاسداران ءَ ھور گوں سپاہ قدس جہانی تروریستانی لیست ءِ سرا آوُرت بلوچ دشمنیں پاکستانی یانی چست ءُ ائیر گیشتر ءُ تیزتر بوتگنت۰ آھاں ماں وتی بلوچ دشمنیں "تبلیغات" لوٹنت تاں امریکی ءُ اروپایی سیاست زانتانی دیما بلوچستان ءِ راجی جنزءِ جھدکاراں گوں تروریستی سپاہ ءَ ھور ءُ ھمکار پیش بدارنت ۰ 

پاکستانی لابی ءُ پنجاپی ٹولیانی ناھودگیں واب ایش انت کہ بلوچ ءِ نام گوں سپاہ ءِ جھانی تروریسم ءَ ھور تَرّینگ بہ بیت۰

 رودراتکی بلوچستان ءِ  راجی رھشون ءُ ھوربند ءُ سرمچارانی یکے چہ مزنیں اگدہ یاں ماں ھنوگیں پرجنجالیں دَورایش انت کہ گوں شیواری ءُ روشن ھیالی بلوچ دشمنیں پاکستانی لابی یان ءُ پنجاپی ٹولی جھانی پڑءَ پروش بدینت۰ ھرراجی ھوربند ءُ رھشونے ءَ جھد ءُ کوشست کنگی انت تاں بلوچ ءِ نام گوں پاسدارانی جھانی تروریسم ءَ ھمگرنچ پیش دارگ مہ بیت۰
تاں امریکایی یاں بلوچ ھوربند یا رھشونے ءَ نام گِر نہ کتگ انت باید انت گوں تدبیرءُ دورچاری مروچی کارے کنگ بیت پرچا کہ باندات ءُ پوشی بلکیں دیر بہ بیت۰

محمد کریم بلوچ

چارِ جون ۲۰۱۹