امریکاے ءِ سیاست ءُ بلوچانی ناتپاکی

کم ءُ گیش دہ سال انت کہ امریکی سیاست زانت ءُ سناتور گوں بلوچاں دیوان ءُ گپ ءُ تران کنگ اَنت۰ آھاں وتی مکسد ءُ مراد چہ اے دیواناں ھست ءُ پہ ھمیش انت کہ وتی رابطہ  گوں  بلوچ رھشوناں برجاہ داشتگ اَنت۰ ھچ شکّ ءُ شھبہ اے نیست کہ آھاں مدام وتی ملک ءِ نپ ءُ سیتاں چارنت ءُ لوٹنت چہ بلوچ سرزمین ءِ نیامتان بے بھر مہ بنت ءُ  بلوچستان ءِ استراتژیکی جاگہ ءَ ماں جھانی سیاست ءُ اقتصاد روچ پہ  روچ گیشتر دلگوش گور کنگ انت

آ گندگ انت کہ چین ءُ چینی زردار گوں پاکستان ءِ ھونواریں لشکرءِ ھمدستی ءَ پہ بلوچستان  ھما  واب دیستہ کہ ھم پہ بلوچ راج ءَ مزنیں تاوانے ءُ ھم پہ امریکا۰ آ گندگ انت کہ چینی ءُ پنجاپی ڈنگاں اشتاپ اشتاپ وتی مزنیں پروجکتاں چوش کہ "سی پیک " ءُ گوادر ءُ سیاھیں ڈکّ ( سایندک ) ءَ دیما برگ انت تاں بلوچانی مال ءُ مڈی یاں گیشتر پل ءُ پانچ بہ کننت۰  چہ دگہ نیمگے بلوچانی لوگاں سوچگ انت ءُ ھما بلوچ کشی کنگاینت کہ ماں بلوچانی مُلک ءُ راجدپترا بےدرو انت۰

ماں کوھنیں دَوراں ھچبر چینی  ءُ  پنجاپی  بلوچستان ءِ ھلاپ ءَ تاں مروچیگیں انداز ھم شور نہ بوتگنت۰ آھاں سیاسی، سلھبندی ءُ اقتصادی ھمکاری ھست۰ پنجاپی یاں مروچاں گوں چینی ڈنگاں سانگبندی کنگ انت تاں وتی نپ ءُ سیتّاں گیشتر گوں یکدگرا ھمگرنچ  بہ کننت۰

اگاں چہ امریکایی ھنوں دیمترا کِنزتَگ انت ءُ "پہ دل" گوں بلوچاں دیوان ءُ تران کنگ لوٹنت بلئے بلوچانی رھشوں وڑ وڑیں گر و چیلاں کپتگ انت ءُ ھنچوشیں مشکلاں دیم پہ دیم انت کہ بلوچانی تپاکی ءِ دیمپان انت۰

اپسوزی گپے کہ چنت بلوچ رھشون ماں تروریستی سپاہ قدس ءِ دام ءَ کپتگ انت ءُ  تروریستی سپاہ ءِ لوٹ ءِ بریبرا   بلوچ راج ءِ  سالانی سال ءِ جد ءُ جہد اں ماں رونشتی بلوچستان ءَ پہ بیہ انکار کنگ انت ءُ مئے ھزاراں شھیدءِ کربانی یاں نہ منّ انت !

اے پرجَزَبگیں رھشوں اگاں وتا چہ سپاہ ءِ جہانی تروریستاں بہ سِند انت پہ بلوچستان ءُ بلوچ راج ءَ مزنیں نپ ءُ استراتژیکی سوبے۰

دومی گپ ایش کہ ھما بلوچ رھشوں کہ گوں امریکی کاسداں نزّیک انت دلگوش گور کنگی انت کہ مزنیں سیاسی کاراں تپاکیں مردم گِھترکت کننت۰ بُن گپ بلوچ ءُ آزاد بلوچستان انت ءُ مئی پدریچانی  زند ءُ زندجاورانی مسئلہ انت۰ اے یک ءُ دو نپر یا تہنائیں گروپےءِ کار نھنت۰ بلوچستان ءَ سیاسی ءُ اگدہ داریں ھوربند  بایدانت یکدگرءِ وجود، زانت، تجربہ، کارکرد ءُ راجی جھدکاریاں بہ منّ انت۰ یکدگرءِ ایرجَنگ تپاکی ءِ دمپانے ءُ اے " تاں من نہ کشتگ ھلار نھنت" ءِ پگر ءَ بسوچنت۰

سومی گپ اش کہ اگاں ماں آیوکیں دیواناں چہ ھمک بلوچی سیاسی ھوربندے کہ آجویی ءِ لوٹوک انت یک نمایندہ اے ھوربہ بیت گھتر انت ءُ لازم انت یک گچینی گروپے چہ زانتکارءُ تجربہ کاریں راجی رھشوناں گوں تپاکی "مذاکرات" ءُ دیواناں سیستماتیکیں وڑے ءَ دیما برنت تا اے دیواناں گوں امریکی سیاستزانت ءُ سناتوراں پہ بلوچ راج ءُ بلوچستان ءَ گھتریں برورد بزاں نتیجہ بہ دنت ۰ 

محمد کریم بلوچ