بلوچ سردارانی بدکولی ءِ دو دَروَر

بلوچستان   ءِ راجدپتر ءِ یک تهاریں بهرے هما سردار ءُ بے سمائیں سردارزادگانی باروانت که گوں ڈنّی یاں همراه بوتگ ءُ په بلوچ ءُ بلوچستان ءِ ایردست دارگ ءَ گوں دژمناں  همشؤر بوتگنت۰

اے درآمد پسندیں ٹولی په وتی اَدارُکی نپ ءُ سیتانی هاترا  بلوچ راج  ءَ بے کساس  تاوان داتگ ءُ گلزمین اِش ویران کنائینتگ۰

اداں دو هنچوشیں راجدپتری دروَر نام گِر کنوں  که مئے ڈیه ءُ راج اِش بے کساس تاوان داتگ ءُ گشت کنیں که مُلک ءِ تباهی ءُ مرچیگیں بدیں جاورانی دو مزنیں سَوَب اِنت۰ ا ولی دُروَر رونشتی بلوچستانءِ بارواِنت ۰

هما درگت ءَ ( نوامبر ۱۹۲۸) ءَ که گجرانی لدیگی لشکر چه مَشَد، بیرجند ءُ کرمان گوں امان۰۰۰ جهانبانی ءِ سروکی ءَ آتک ءَ گلزمین ءِ سرا هلگر کرت، هاسکار رند چه دِزَّک ءِ جنگ ءَ  دوازده کسان ءُ مزنیں سردار گوں شهید میر دوست محمد هان ء بدکولی کرت. آ  بلوچستان ءِ لشکر ءَ یله کت ءُ  چه میدانِ جنگ ءَ جِست اَنت (تتک انت) ۰ چنت نپرچه آهان دَرادَر گوں جهانبانی هور بوتنت ءُ چنتے دگه کاسد ءُ کلوه راه دات که آهاں "تسلیم" اَنت ءُ نه لوٹنت پارس ءِ لشکرءِ دیما به اوشتنت۰

دومی  دَروَر بلوچ سرزمین ءِ رودراتکی بهرءِ بارواِنت۰ 

سال ۱۹۴۸ میلادی ءَ سردارِ هاران، جامِ لس بیله ءُ گِچکی یانی سردار‌ گوں میر  احمد یارهان بد کَولی کرت.  آهاں  گوں محمد علی جناح هم شور بوتنت. 

اداں گوشگی انت که ۱۱ اگست ۱۹۴۷ ءَ آزاد بلوچستان ءِ وت مستری چه انگریز ءُ هندوستان ءِ نیمگ ءَ منّگ بوت۰ هما درگت ءُ "بیانیه آزادی بلوچستان" چه رادیو دهلیءَ هم شنگ بوت۰ بلئے چنت ماه ءَ رند  چه بلوچانی بدنسیبیءَ سئے بلوچ سردار جار جت که بیله؛ کیچ ءُ هاران گوں پاکستان ءَ هوار بنت ءُ اے وڑا آزاد بلوچستان ءِ ریاست ءُ کلات ءِ واکداران  باز نزور کنگ بوت اِنت۰

گڈسرا  ۲۷ مارچ ۱۹۴۸ ءَ  پاکستان ءِ لشکر کلاتءِ سرا هلگر کت ءُ رودراتکی بلوچستان آوار جَنَگ  ءُ بلوچ راج ایردست کنگ بوت۰

محمد کریم بلوچ

نوامبر ۲۰۱۹